سائنس اور ٹیکنالوجی

university-of-agriculture
university-of-agriculture

زرعی یونیورسٹی فیصل آباد ہینڈ آؤٹ

فیصل آباد 27مئی 2013ء (زرعی میڈیا ڈاٹ کام ) بین الاقوامی سطح پر سائنس اور ٹیکنالوجی کے شعبے میں مقابلے کے لئے تعلیمی و تحقیقی شعبے سے وابستہ افرادی قوت کو اپنی استعدادکار میں اضافے کے لئے نئی ضروریات کے ساتھ خود کو ہم آہنگ کرنا وقت کی اہم ترین ضرورت ہے۔ ان باتوں کا اظہار زرعی یونیورسٹی فیصل آباد کے وائس چانسلر پروفیسر ڈاکٹر اقرار احمد خاں نے ڈائریکٹوریٹ آف ریسرچ اختراع و تجارت سازی کے زیراہتمام لیکچرروں اور اسسٹنٹ پروفیسروں کے ایک اجلاس سے بطور مہمان خصوصی اپنے خطاب کے دوران کیا۔ انہوں نے کہا کہ ہائرایجوکیشن کمیشن نے جامعات کی درجہ بندی اور تحقیقی منصوبوں کو وسائل فراہم کرنے کے لئے آؤٹ ریچ کی اہمیت یقینی بنائی ہے یہی وجہ ہے کہ یونیورسٹی نے ہر ہفتے آؤٹ ریچ کے پروگرام کے لئے ایک دن مختص کر دیا ہے۔ انہوں نے کہا کہ یونیورسٹیوں میں ہونے والی تحقیق اب لائبریریوں کی زینت بننے کی بجائے لوگوں کے مسائل کے حل اور اس سے اشیاء و خدمات کا نیا سلسلہ شروع کر دیا گیا ہے۔

سائنس اور ٹیکنالوجی

انہوں نے سائنسدانوں پر زور دیا کہ وہ اپنی ذاتی ترقی کے لئے ریسرچ پیپرز کی اشاعت کے ساتھ ساتھ اپنے تحقیقی امور کو عوام کی خدمت کے لئے بھی وقف کریں تاکہ معاشرے پر اس کے مثبت اثرات دیکھے جا سکیں۔ ڈاکٹر اقرار احمد خاں نے کہا کہ بین الاقوامی رینکنگ میں یونیورسٹی کا ابتدائی 150یونیورسٹیوں میں شامل ہونا یونیورسٹی اساتذہ کے لئے ایک چیلنج کی حیثیت رکھتا ہے اور آنے والے دنوں میں ہمیں اس سے بہتری کی طرف سفر کرنے کے لئے بین الاقوامی معیارات سے خود کو ہم آہنگ کرنا ہو گا۔ ان سے پہلے ڈائریکٹر ORIC ڈاکٹر آصف علی نے خطاب کرتے ہوئے کہا کہ کیو ایس رینکنگ کی بنیاد پر یونیورسٹی کو جو بین الاقوامی سطح پر پذیرائی ملی ہے اس سے ہمیں دنیا کی اعلیٰ ترین 100یونیورسٹیوں میں شمولیت کے لئے ایک نیا ولولہ میسر آیا ہے اور نوجوان سائنسدان آنے والے سالوں میں پاکستان کا نام روشن کرنے کے لئے بھرپور عزم رکھتے ہیں۔ ڈائریکٹر شعبہ نباتیات پروفیسر ڈاکٹر عبدالواحد نے بین الاقوامی درجہ بندی کے حوالے سے مختلف پیمانوں کے بارے میں نوجوان اساتذہ کو تفصیلی بریفنگ دیتے ہوئے ان کے خدوخال پوری تفصیل کے ساتھ بیان کئے۔ انہوں نے کہا کہ آنے والے سالوں میں یونیورسٹی اپنے تعلیمی و تحقیقی معیار کی بدولت نہ صرف ایشیاء بلکہ پوری دنیا میں اپنے آپ کو بلند ترین درجے پر فائز کرنے میں کامیابی حاصل کر لے گی۔ تقریب کی نقابت کے فرائض عائشہ ارشد نے ادا کئے۔
Copy Rights @Zaraimedia.com

This website uses cookies to improve your experience. We'll assume you're ok with this, but you can opt-out if you wish. Accept Read More