زرعی یونیورسٹی فیصل آباد میں جاری جشن بہاراں کا ابتدائی مرحلہ

زرعی یونیورسٹی فیصل آباد ہینڈ آؤٹ

فیصل آباد 7 2 مارچ(زرعی میڈیا ڈاٹ کام )زرعی یونیورسٹی فیصل آباد میں جاری جشن بہاراں کا ابتدائی مرحلہ آل پاکستان گرے ہاؤنڈز ٹریک ریس کے ساتھ شروع ہوگیا ہے جس میں چاروں صوبوں اور آزاد کشمیر سے ڈیڑھ سو کے لگ بھگ شکاری کتے اپنے گروپس میں شرکت کر رہے ہیں۔ افتتاحی تقریب کے مہمان خصوصی ڈائریکٹر جنرل ریسرچ پنجاب ڈاکٹر نور الاسلام خان تھے۔

سات مرحلوں پر مشتمل آل پاکستان گرے ہاؤنڈز ٹریک ریس اس حوالے سے منفرد اور پاکستان کی پہلی ٹریک ریس ہے جس کے تمام مقابلے مصنوعی روشنیوں میں منعقد کئے جا رہے ہیں۔ دیہی سطح پر شکاری کتوں کی اچھی نسلوں کو پروان چڑھانا ایک اہم مشغلہ اور خصوصی دلچسپی کاحامل شوق ہے جو دیہی کلچر کا خوبصورت عکاس قرار دیا جاتا ہے۔یونیورسٹی میں جاری جشن بہاراں تقریبات میں زرعی و صنعتی نمائش‘ فینسی برڈز شو‘ پالتو جانوروں کا ( پٹ شو)‘ فلاور شو‘ ایلومنائی ایسوسی ایشن کا اجلاس و مشاعرہ‘ کلچرل شو‘ فوڈ سٹریٹ‘ لکی ایرانی سرکس ‘ موت کا کنواں اور کسان میلہ شامل ہیں۔ مذکورہ پروگرامز کے ساتھ ساتھ اقبال آڈیٹوریم میں یونیورسٹی کے سابق طلبہ کااجلاس جمعہ 29مارچ کی صبح منعقد ہوگا جبکہ نیو سینٹ ہا ل میں ’’پاکستان میں توانائی کی صورتحال‘‘ اور’’ زرعی شعبہ میں نئے کاروباری فروغ اور روزگار کے مواقع‘‘ کے موضوع پر سیمینار بھی اسی دن منعقد ہونگے۔ کلیہ زرعی انجینئرنگ کے زیراہتمام پاکستان میں توانائی کی صورتحال میں آئل و گیس ریگولیٹری اتھارٹی (اوگرا) کے چیئرمین سعید احمد خاں بطور مہمان خصوصی جبکہ فیسکو کے چیف ایگزیکٹو آفیسر رانا عبدالجبار خاں مہمان اعزاز ہوں گے۔ علاوہ ازیں بعد نماز جمعہ منعقد ہونے والے دوسرے سیمینار میں ہائر ایجوکیشن کمیشن اسلام آباد کے ایگزیکٹو ڈائریکٹر ڈاکٹر مختار احمد مہمان خصوصی کی حیثیت سے شریک ہونگے۔