گریڈ1تا 16ملازمین سے اپنے خصوصی خطاب: ڈاکٹر اقرار احمد

زرعی یونیورسٹی فیصل آباد کے انتظامی سٹاف
زرعی یونیورسٹی فیصل آباد کے انتظامی سٹاف

فیصل آباد 09مارچ:  زرعی یونیورسٹی فیصل آباد کے انتظامی سٹاف کی جدید خطوط پر ٹریننگ کے ساتھ ساتھ ان میں سے بہترین خدمات سرانجام دینے والوں کو بیسٹ ورکر ایوارڈز سے بھی نوازا جائے گا۔ یہ باتیں زرعی یونیورسٹی فیصل آبادکے وائس چانسلرپروفیسرڈاکٹر اقرار احمد خاں نے اقبا ل آڈیٹوریم میں گریڈ1تا 16ملازمین سے اپنے خصوصی خطاب میں کہیں۔

ڈاکٹر اقرار احمد خاں نے حاضرین کو یقین دلایا کہ جلد ہی ترقی کے منتظر ڈیڑھ سو سے زائد ملازمین کا نوٹیفکیشن جاری کر دیا جائے گا جبکہ گزشتہ 15ماہ سے تقرریوں اور ترقیوں کے حوالے سے زیر التوا معاملات کو بھی آئندہ چند ہفتوں میں نمٹا دیا جائے گا۔
ان کا کہنا تھا کہ گزشتہ پانچ برسوں کے دوران یونیورسٹی ملازمین کیلئے ڈیڑھ سوکے لگ بھگ نئی رہائش گاہیں تعمیر کی گئی ہیں جن میں اضافہ کیلئے بھی سنجیدہ کوششیں بروئے کار لائی جائیں گی۔انہوں نے بتایا کہ آئند چند روز میں حکومت کی طرف سے ہائر ایجوکیشن کمیشن کے 9ارب سے زائد کے فنڈز جاری کر دیئے جائیں گے جس کے بعد ملازمین کے بقایا جات کی ادائیگی کا عمل فوری شروع کر دیا جائے گا۔ڈاکٹر اقرار نے بتایا کہ آئند چند ہفتوں میں جامعہ میں سنٹر فار ایڈوانسڈ سٹڈیز کا قیام عمل میں لایا جائیگا جس میں سپورٹنگ و ٹیکنیکل سٹاف کی استعداد کار میں اضافہ کیلئے ضروری تربیت کا عمل بھی شامل ہوگا ۔
انہوں نے گزشتہ پانچ برسوں کے دوران انتھک محنت اور ذمہ داری و دیانتداری سے فرائض ادا کرکے قومی اور عالمی سطح پر یونیورسٹی کیلئے نیک نامی اور اس کی درجہ بندی میں اضافے کا سبب بننے والے ملازمین کے کردار کو خصوصی طور پر سراہا۔یونیورسٹی کے رجسٹرار چوہدری محمد حسین نے گریڈ 1تا 16ملازمین کی طرف سے ڈاکٹر اقرار احمدخاں کو دوبارہ تعیناتی پر مبارکباد پیش کرتے ہوئے ادارے کی ترقی کیلئے مزید محنت کے عزم کااعاد ہ کیا۔پرنسپل آفیسر تعلقات عامہ و مطبوعات ڈاکٹر محمد جلال عارف نے خطبہ استقبالیہ میں واضح کیا کہ یونیورسٹی کی قومی و بین الاقوامی رینکنگ میں سپورٹنگ و انتظامی سٹاف کا کردار کسی سے کم نہیں ہے اور گزشتہ چند برسوں کے دوران اساتذہ‘ سائنس دانوں اور انتظامی سٹاف نے جس محنت و دیانتدار ی سے مثالی خدمات سرانجام دی ہیں‘ اسی کی بنیاد پر یونیورسٹی کی عالمی درجہ بندی میں اضافہ ممکن ہوا اور وہی ڈاکٹر اقرار احمد خاں کی دوبارہ تعیناتی کا باعث بنا۔
انہوں نے یونیورسٹی قیادت سے مطالبہ کیا کہ محنت اور ذمہ داری سے فرائض ادا کرنے والے ملازمین کو مختلف کیٹیگریز میں بیسٹ ورکرز قرار دیتے ہوئے 14اگست کے قومی دن پر منعقدہ پروقار تقریب میں ان کی حوصلہ افزائی کی جائے۔ٹریژر اشرف ممتاز بھی اس موقع پر تقریب میں موجودتھے ۔
زرعی یونیورسٹی فیصل آباد ہینڈ آؤٹ
University of Agriculture Faisalabad (UAF), Agriculture in PakistanCopyright:  Zaraimedia.com

This website uses cookies to improve your experience. We'll assume you're ok with this, but you can opt-out if you wish. Accept Read More