موسم سرمامیں جانوروں کو صحت مند رکھنے کے لیے حفاظتی ٹیکہ جات کی خصوصی مہم جاری

لائیوسٹاک اینڈڈیری ڈویلپمنٹ مویشی پال حضرات کو بروقت اپنی خدمات فراہم کررہاہے

تاریخ: 20جنوری 2013

موسم سرمامیں جانوروں کو مختلف بیماریوں سے محفوظ اورانہیں صحت مند رکھنے کے لیے حفاظتی ٹیکہ جات کی جاری مہم کاجائزہ لینے کے لیے ایک محکمانہ میٹنگ کاانعقاد ہوا جس کی صدارت احمدعلی اولکھ وزیرلائیوسٹاک و زراعت نے کی۔ میٹنگ میں محمدعرفان الہٰی سیکرٹری لائیوسٹاک پنجاب،ڈاکٹرمحمدنوازسعید ڈائریکٹرجنرل(توسیع)، ڈاکٹراسرارحسین چوہدری ڈائریکٹرکمیونیکیشن اینڈ ایکسٹینشن اورمحکمہ لائیوسٹاک کے دیگرڈائریکٹرز اورافسران نے شرکت کی۔ میٹنگ کے شرکاء سے بات چیت کرتے ہوئے احمدعلی اولکھ وزیرلائیوسٹاک و زراعت نے کہاکہ محکمہ لائیوسٹاک اینڈڈیری ڈویلپمنٹ مویشی پال حضرات کو بروقت اپنی خدمات فراہم کررہاہے۔

ہرموسم میں مویشیوں کی صحت وعلاج، معالجہ اوربہترپیداوارکے لیے بھی ان کی رہنمائی کررہاہے۔ اب موسم سرماکی شدت میں محکمہ نے جانوروں کو تندرست رکھنے اورمختلف بیماریوں سے محفوظ رکھنے کے لیے حفاظتی ٹیکہ جات کی خصوصی مہم کابھی آغاز کردیاہے۔

جس کے تحت صوبہ بھر میں مویشیوں کی ویکسینیشن کے لیے تمام اضلاع کے ویٹرنری ہسپتالوں میں جانوروں کوحفاظتی ٹیکہ جات لگائے جارہے ہیں اورپنجاب کے 22اضلاع میں موبائل ویٹرنری ڈسپنسریاں بھی سرگرم عمل ہیں۔بڑے جانورمثلاً گائے بھینس میں منہ کھر،چھوٹے جانوروں مثلاً بھیڑبکریوں میں انتڑیوں کازہر اورنمونیاجبکہ مرغیوں میں رانی کھیت اورفاؤل پاکس کے حفاظتی ٹیکہ جات لگائے جارہے ہیں۔لہٰذا مویشی پال حضرات ایمرجنسی کی صورت میں اپنے جانوروں کو بیماریوں سے بچانے کے لیے بروقت حفاظتی ٹیکہ جات لگوائیں۔ میٹنگ کے دوران ڈاکٹرمحمدنوازسعید ڈائریکٹرجنرل(توسیع)نے وزیرلائیوسٹاک و زراعت کو بریفنگ دیتے ہوئے کہاکہ جانوروں میں بیماریوں کی روک تھام کے لیے محکمہ کی جانب سے شروع کی گئی حفاظتی ٹیکہ جات کی خصوصی مہم کی وجہ سے صوبہ بھر میں جانوروں میں کوئی وبائی امراض دیکھنے میں نہیں آئے۔

اس موقع پر احمدعلی اولکھ وزیرلائیوسٹاک و زراعت نے ہدایات دیتے ہوئے کہاکہ فیلڈ میں کام کرنے والے ویٹرنری ڈاکٹرز اورپیراویٹرنری سٹاف اپنے فرائض تندہی سے انجام دیں تاکہ عوام الناس کو معیاری دودھ گوشت اورانڈوں کی فراہمی بروقت ممکن ہوسکے اورملکی غذائی ضروریات پوری کرنے میں کوئی دقت پیش نہ آئے انہوں نے مزید کہاکہ اپنے فرائض میں کوتاہی کرنے والے افسران اورملازمین کے خلاف قانونی کاروائی عمل میں لائی جائے گی۔